على اسم مصرالشاعرصلاح جاهين
على اسم مصرالتاريخ يقدر يقول مايشاء
وأنا مصر عندي أحب وأجمل الأشياء
بحبها وهيا مالكه الارض شرق وغرب
بحبها وهيا مرميه جريحه حرب
بحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي فـ درب
وتلتفت تلاقيني جنبها في الكرب
والنبض ينفض عروقي بألف نغمة وضرب
على اسم مصر
مصر النسيم في الليالي وبياعين الفل
ومرايه بهتانة ع القهوة - أزورها - واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل المصرى
باشا بشواربه اللي ما عرفوا الذل
ومصر فوقفي الفراندة واسمها جولييت
ولما جيت بعد روميو بربع قرن بكيت
ومسحت دمعي في كمي ومن ساعتها وعيت
على اسم مصر
مصر السما الفزدقي وعصافير معدية
والقلة مملية على الشباك - مندية
والجد قاعد مربع يقرا في الجرنال
الكاتب المصرى ذاته مندمج في مقال
ومصر قدامه اكتر كلمة مقرية
قريتها من قبل ما اكتب اسمي بإيديا
ورسمتها في الخيال على أبدع الأشكال
ونزلت أيام صبايا طفت كل مجال
زي المنادي وفؤادي يرتجف بجلال
على اسم مصر
النخل في العالي والنيل ماشي طوالي
معكوسة فيه الصـور - مقلوبة وانا مالي
يا ولاد أنا فـ حالي زي النقش في العواميد
زي الهلال اللي فوق مدنة بنوها عبيد
وزي باقي العبيد باجري على عيالي
باجري وخطوي وئيد من تقل أحمالي
محنيه قامتي - وهامتي كأن فيها حديد
وعينيا رمل العريش فيها وملح رشيد
لكني بافتحها زي اللي اتولد من جديد
على اسم مصر
موضوع: على اسم مصر 
الثلاثاء مايو 31, 2011 7:24 am
