يآمنه لعبد الرحمن الابنودي

يآمنة
عبد الرحمن الابنودى
والله وشبت ياعبد الرحمن.. عجزت ياواد.؟
مُسْرَعْ ؟ميتى وكيف؟
عاد اللى يعجز فى بلاده غير اللى يعجز ضيف.!!ه
هلكوك النسوان؟
شفتك مرة فالتلفزيون.ومرة ...ورونى صورتك فى الجورنان
وقلت كبر عبد الرحمن.!!ه
أمال انا على كده مت بقالى ميت حول.!!ه
والله خايفة ياوليدى القعدة لتطول
مات الشيخ محمود. وماتت فاطنة ابن قنديل
واتباع كرم اب غّبان. وانا لسه حية
وباين حاحيا كمان وكمان.ه
عشت كتير
عشت لحد ماشفتك عجزت يا عبد الرحمن
وقالولى قال خلفت
وانت عجوز خلفت ياخوية؟؟
وبنات..!!؟
امال كنت بتعمل ايه طيلة العمر اللى فات؟
دلوقت ما فقت؟
وجايبهم دلوقت تعمل بيهم ايه؟
على كلِّ.....ه
اهى ريحة من ريحتك ع الارض
يونسوا بعض
ماشى ياعبد الرحمن
اهو عشنا وطلنا منك بصة وشمة
دلوك بس ما افكرت فيامنة وقلت ياعمة؟؟
حبيبى انت يا عبد الرحمن
والله حبيبى ..وتتحب
على قد ماسارجاك الغربة
لكن ليك قلب
مش زى ولاد الكلب اللى نسيونا زمان
حلوة مرتك وعويلاتك
والا شبهنا..؟
سمتهم ايه..؟قالولى :آية ونور
ماعرفشى تجبلك حتة واد؟
ولا اقولك
يعنى اللى جبناهم نفعونا فالدنيا بإيه؟
غير شى الانسان مغرور.!!ه
ولسه يامنة هتعيش وحتلبس لما جايبلى قطيفة وكستور؟
كنت اديتهملى فلوس اشترى للركبة دهان
آباى مامجلّع قوى يا عبد الرحمن
طب ده انا ليه ست سنين مزروعة فى ظهر الباب
لم طلوا علينا أحبة ولا اغراب
خليهم ..ينفعوا أعملهم اكفان..!!ه
كرمش وشى.فاكر يامنة وفاكر الوش.؟
إوعى تصدقها الدنيا...ه
غش فغش..!!هاذا جاك الموت ياوليدى
موت على طول
اللى اتخطفوا فضلوا احباب
صاحيين فالقلب كإن ماحدش غاب
واللى ماتوا حتة حتة
ونشفواووهم حيين
حتى سلامو عليكوا مش بتعدى من برة الاعتاب
اول مايجيلك الموت افتح
اول ماينادى عليك ..إجلع
انت كسبان
اوعى تحسبها حساب.!!ه
بلا واد ...بلا بت
ده زمن يوم ما صدق كذاب.!!ه
سيبهالهم بالحال والمال وانفد
اوعى تبص وراك
الورث تراب
وحيطان الايام طين
وعيالك بيك مش بيك عايشين..!!ه
يو.....ه يازمن
مشوار طولان
واللى يطوِّله يوم عن يومه ياحبيبى.حمار
الدوا عاوزاه لوجيعة الركبة
مش لطولة العمر
اوعى تصدق ألزنها صفر وحمر
مش كنت جميلة ياواد؟
مش كنت وكنت
وجدعة. تخاف منى الرجالة..؟
لكن فين شوفتنى..؟
كنتوا عيال!!ه
بناتى راضية ونجية ماتو وراحوا
وأنا اللى قاعدة
طيب يازمن.!!ه
إوعى
إوعى تعيش بوم واحد بعد عيالك
إوعى يا عبد الرحمن
فى الدنيا أوجاع وهموم اشكال والوان
الناس مابتعرفهاش
اوعى هم لو هتعيش بعد عيالك ما تموت
ساعتها بس...
ها تعرف ايه هو الموت.!!ه
اول ما يجيلك ...نط
لسه بتحكلهم بحرى حكاية
فاطنة حرامى الفوط..؟
آباى ماكنت شقى وعفريت
من دون كل الولدان
كنت مخالف ..براوى..ه
وكنت مخبى فى عنيك السحراوى
تملى حاجات
زى الحداية....هتخوى ع الحاجة..وتطير
من صغرك بضوافر واعرة ..ومناقير
بس ماكنتش كداب
وآدينى استنيت فالدنيا
لما شعرك شاب..!!ه
قادم البيت
اتهدت قبله بيوت وبيوت
وأصيل هوه..ه
مستنينى لما اموت..!!ه
هاتيجى العيد الجاى؟
واذا جيت
هاتيجى لجاى؟
وهتشرب مع يامنة الشاى.؟؟
هاجى ياعمة وجيت..ه
لا لقيت يامنة ولا البيت

نايس يا ابو حمزه تسلم ايدك
الابنودي الشعب المصري بعينه اللي علي طبيعته
اما الكبرياء لله سبحانه وتعالى

تسلم

قمة التالق الابنودى مفيش اى كلام
دايما سندباد متالق
وفى تميز مستمر
دومت بكل ود

» مجموعه خواطر الشاعر الجميل الخال عبد الرحمن الابنودي
» قصيدة الميدان - عبد الرحمن الابنودي
» عبد الرحمن بن عوف
» من هم عباد الرحمن...؟؟
» انا عضو جديد في المنتدى عبد الرحمن